“10أيام”… مجرد عشرة أيام كافية باش يوصل الطبيب، تتصلح الطرق، يطلق الريزو، وتتبسط الرخص!
آش بغيتي أكثر وضوح من هكا؟ مطالب كانت كتشبه أحلام بعيدة، تحولت بين ليلة وضحاها إلى التزامات رسمية. إيوا فين كنتو هاد السنين كاملين؟
سكان أيت بوكماز، اللي تعبوا من الحفر والبرد والعزلة، مشاو مشيا على الأقدام يومين كاملين، ودارو مسيرة وصلات الرسالة: “صوت الجبل ما كيسكتش!”.
وعد بـ10 أيام… ولكن فين كنتو؟ عامل الإقليم وعد:
طبيب غادي يجي فـ10 أيام.
رخص البناء غادي تبسط، والإعفاء من الرسوم.
الطرقات غادي تتهيأ خلال 3 إلى 4 أشهر.
الريزو غادي يطلق في أقل من 3 أشهر.
ملعب للشباب قريباً.
إيلا هادشي كلو يقدر يتحقق فهذ المدة القصيرة، علاش ما وقعش من قبل؟ واش كان خاصنا نفيقوكم بمسيرة على الأقدام، والبرد القارس، والعراء، باش تحسو بوجع الجبل؟
مطالب ماشي خيالية… ماشي غالية! المطالب ديال الساكنة بسيطة: طرق صالحة، طبيب يداوي، ريزو يربطهم بالعالم، ملعب يفرح ولادهم، مدارس تمنع الهدر المدرسي.
إيلا كلو يقدر يتدار فـ10 أيام، راه التكلفة ماشي باهضة، ولكن كانت الإرادة باهضة!
فين كانت الإرادة؟ سنين وسنين والناس كيمشيو فالحفر، كيسافرو ساعات على رجلين باش يلقاو دوا، وولادهم كيتحرموا من التعليم عن بعد.
اليوم، غير مسيرة وحدة خلات الكل يتحرك، ووعود تنهال بحال الشتاء… إيوا هادشي كيأكد أن التهميش ماشي قدر محتوم، ولكن كان سياسة صامتة، لولا صوت الجبل اللي قرر ينفجر.
أيت بوكماز قالت كلمتها اليوم، ساكنة أيت بوكماز وضحات الدرس: إيلا ما خرجتيش تصرخ، ما كيسمعوكش. إيلا ما تحدّيتش الصمت، كيبقاو يشوفوك رقم في الإحصاء.
الكرة دابا في ملعب المسؤولين: واش غادي تلتزمو، ولا غادي ترجعو تنعسو حتى يجي احتجاج آخر؟
