وبين وزير ووزير، تاه القطيع.. والغلوسي دخل يدوّي بالصوت العالي.
في الوقت اللي المغاربة كيسولو: واش العيد كاين هاد العام الجاي؟ خرج محمد الغلوسي، رئيس الجمعية المغربية لحماية المال العام، في ندوة صحفية عقدت أمس بالرباط، ، وقالها بالحرف: كاين شي لعب فملف الأغنام!
فالندوة ديالو الغلوسي صبّ الزيت فوق نار الجدل القديم/الجديد ديال استيراد اللحوم الحمراء، وانتقد كيفاش كيتلعبو بالأرقام بين وزير سابق كيقول القطيع بخير وعلى خير، ووزير جديد كيقول راه نقص بـ38%، وسوّل بصراحة:
“فين مشاو الملايين ديال الرؤوس؟ واش وقعات شي نازلة وما خبرتونا؟”
🐑 القطيع تاه، والدعم تبخر، والمغاربة باقيين كيتسناو الكباب
حسب الغلوسي، البلاغ الملكي اللي حط الملف فـيد وزارة الداخلية، راه فحد ذاتو اعتراف مبطّن بالفشل، خصوصاً عند الجمعية الوطنية لمربي الأغنام ووزارة الفلاحة.
أما الدعم الفلاحي، فراه كيوصل حتى لـ850 درهم للرأس، ولكن شكون شاف واش وصل فعلاً للكسّابة؟ لا لوائح، لا شفافية، وناس كيتشكاو من أنهم كيضطرو يعطيو 30% من الدعم باش يستافدو.
ترقيم وتلقيح القطيع؟ صفقات بالمليارات، ولكن بلا أسماء، بلا معايير، بلا حتى ورقة واضحة!
💸 دبا خاصنا نعرفو: شكون كلا الدعم.. وشكون كيشوي فالشفافية؟
الغلوسي ما دارش فمو الماء، وطلب تحقيق نزيه فكلشي:
من توزيع الدعم، لتسيير الجمعية، لصفقات التلقيح، حتى للناس اللي باغين يديرو من القطيع بقرة حلوب بدون حليب!
إيوا آ المسؤولين،
بلا ما تبقاو تدّيرو لينا القطيع كيتناسل فتصريحاتكم وكيضيع فالصناديق.
المغاربة بغاو لحم العيد،
ماشي مسرحية الأرقام والوعود الفارغة.
