الباز عبدالإله
من بعد ما تخصصات نصف مليار سنتيم باش يشارك المغرب فمعرض فالسعودية، كيرجع لينا لحسن السعدي، كاتب الدولة المكلف بالصناعة التقليدية، بواحد الصفقة جديدة كلها “زواق خارجي” وقوالب داخلية… هاد المرة الوجهة: نيويورك، والمناسبة: معرض دولي مدته 3 أيام فقط، بثمن يفوت 200 مليون سنتيم!
ووفقًا لبعض المصادر الإعلامية، فـالصفقة ديال مؤسسة دار الصانع رصدات 2.011.680 درهم لرواق ما كيتعداش 80 متر مربع… إيوا ديرو الحساب: كل متر كايكل 25 ألف درهم!
بعض المهنيين، اللي باقيين كيتسناو الدعم بحال “الصنعة كتموت قدّام عينيهم”، وصفو هاد الخطوة بـ”العبث”، وقالو أن هادشي بعيد كل البعد على مشاكل القطاع الحقيقيين.
واحد منهم قالها بالحرف حسب نفس المصادر:
“راه ماشي كل مرة نبغيو نبيّنو للعالم أننا عنا قفاطين، نمشيو نطيحو فلوس الشعب فـ3 أيام عرض!”
ووسط الصمت المطبق من الوزارة، كيتكرر نفس السؤال:
فين هو التقييم؟
فين هو العائد؟
وفين غاديين بهاد العقلية ديال “نصرف اليوم، وننسى غدا”؟
كاين تخوف كبير من أن هاد المعارض تولي غير فوطو وسلام، وديكور باش نبانو، أما الصانع التقليدي؟ الله يعمرها دار.
فالمغرب اليوم، الصنعة كتموت، السوق خاوي، والحرفيين تايهين بين القروض والدعم اللي ما كيوصلش… لكن الميزانية؟ ناشطة فالمعارض الدولية!
ياك قلنا: تنمية القطاع؟
ولاّ المقصود هو: تنمية السفرات ؟
