مات شاب مغربي فمدينة توريخون دي أردوز ضواحي مدريد، بعدما تعرّض للتعنيف والتكبيل من طرف شرطي إسباني كان سكران، بلا رحمة، بلا شفقة…
وحتى مات الشاب وهو مربوط بحال المجرمين!
حسب وسائل إعلام إسبانية، الشرطي وزميلو كانو خارجين بالليل، وقالو باللي الشاب المغربي حاول يسرق ليهم الهاتف، شدّوه، كبلو يديه، وطرّحوه فالأرض. ملي وصلات الشرطة الوطنية، لقاتو شبه ميت… دارو الإنعاش، ولكن مشى وخلا قلب الأم مفجوع.
الإسبان دارو خطوة، وقفو الشرطي مؤقتاً حتى يكمل التحقيق، وقالو علانية: كان فحالة سكر!
لكن الغريب، هو الصمت المغربي المريب…
فين الخارجية؟
فين الاذاعةالوطنية اللي كتغطي هواة الطبخ، وساكْتة على دم مواطن مغربي مات خارج البلاد؟
فين المسؤولين ديال الجالية؟
فين السفراء والقناصلة؟
فين المسؤولين اللي كيدّعيو أنهم كيخدمو “مغاربة العالم”؟
مات شاب مغربي ومحدّش تحرّك، محدّش تكلّم، محدّش حتى قدّم التعازي!
وهنا خاصنا نذكّرو الجميع، باللي جلالة الملك محمد السادس نصره الله، ديما كيوصي بالجالية المغربية، وكيأكد أن مصالحهم وخدمتهم فوق كل اعتبار.
الملك، فكل خطاب كيشير بوضوح: “مغاربة العالم رْكيزة من ركائز الوطن، ولازم نحافظو على كرامتهم وحقوقهم.”
لكن المسؤولين للأسف… أذان من طين، وأخرى من عجين.
واش هادي هي “الحماية القنصلية”؟
واش المواطن المغربي فالغربة ما عندوش قيمة؟
راه ماشي أول مرة يموت مغربي بحال هكاك، ولكن أول مرة نشوفو الصمت بهاذ الشكل الفضيع!
الإعلام الإسباني بدا كيدافع على الشرطي، وكيقلب فماضي الضحية، وكيقول “كان عندو سوابق”…
لكن واش “السوابق” تبرّر القتل؟
واش الربط والتكبيل حتى يموت ماشي جريمة؟
العائلة ديال الشاب خرجات كتقول: ولدنا بريء، ما سرق حتى واحد، وقتلوه حيث مغربي، وحيت أجنبي، وحيت عنصريين كيمشيو فالزنقة ببطاقة البوليس!
وإحنا كنزيدو نسولو:
واش ماشي من حقنا نطالبو ببلاغ رسمي من وزارة الخارجية؟
واش الدم المغربي فالغربة رخيص لهاذ الدرجة؟
مغاربة الخارج، اللي كيضخّو الملايير فالاقتصاد الوطني، واللي كيمثّلو وجه المغرب في العالم، خاصهم الحماية والرعاية،
ماشي يتقتلو ويتنسّاو!
اليوم، كاين أم كاتحرق قلبها، وكاين أب تايه فالسكون، وكاينة دولة ساكتة، وكاين “ولد البلاد” تقتل مظلوم…
ومزال ما سمعنا حتى “تعازينا الخالصة”.
اللهم هذا منكر…
مات مغربي، والدولة ساكتة، والإعلام الوطني متواطئ، والمسؤولين دايرين بحال ما وقع والو.
والسؤال اللي باقي مطروح:
شحال من مغربي خاصو يموت باش الخارجية تتحرك؟
