واخا كانوا تيقو فيه، وتْعلّقو فخطاباتو بحال اللي كيتعلّق فـ ريحة العطر بلا عطر… متقاعدو الجزائر بْقاو كيسناو الزيادة اللي وعد بيها “سي طبّون” فالحملة الانتخابية، لكن فاش جا وقت الجد، لقاو راسهم تيقراو ففاتورة، بلا زيادة، بلا كرامة، بلا والو!
طبّون قال: “غادي نزيدكم فالـمعاشات، ونكرّمكم يا أبطال البلاد”.
ولكن دابا؟
زادو غير فـ القهر، وكرّمهم بـ الصمت، وبطّاقة المتفرّج.
الزيادة: غير فالهضرة… والكرامة: بْطاقة انتخابية مؤقّتة
“الحفاظ على الحماية الاجتماعية”، “كرامة المتقاعد”، “زيادة المعاشات فـ 2025″… كلها جمل كتبها طبّون فالورقة، وقراها بحماس قدّام الكاميرات.
ولكن شنو وقع دابا؟
صفر درهم زيادة.
صفر بلاغ.
صفر خجل.
الشيوخ اللي عطاو العمر فالخدمة، وْخلاو الصحة فالبلاد، دايرين طوابير فالبريد، وكيقلبو على الفاتورة باش يعرفو واش زادوهم… ولكن النتيجة؟ زادوهم السكّري والضغط!
طبّون: الملك ديال الوعود الجوفاء
تخيّل معايا رئيس كيوعد الشعب بمنحة 750 دولار للسياحة، ولكن ما دار حتى شيط في الموضوع.
تخيّل معايا رئيس كيهضر على تحلية مليار متر مكعب ديال البحر… وهو ما قادش يصفّي حتى ماء العطش فالمدن.
تخيّل معايا رئيس كيشكي على فرنسا فالنهار، وكيبوس ليها اليد فالليل.
هذا هو طبّون: رئيس كيعطيك الوهم، وكيطلب منك الثقة، وكيخلي لك الغضب!
واش “الجزائر الجديدة” اللي كيتكلم عليها طبّون هي هادي؟
ـ متقاعد تيطلب حقو فالفيسبوك
ـ وزير كيهرب من البرلمان
ـ ونظام كيعيش ففقاعة إعلامية، بحال اللي عايش فـ كوكب آخر!
الناس ما بقاوش باغين القصص… بغاو الفلوس فالبوسطا، والكرامة فالمعاملة، وشي دولة تحشم شوية.
“ياك قلتي الكرامة حق؟ وديتينا فصندوق ديال النسيان؟ راه المتقاعد ماشي سلعة كاتتهرس وتتنسى، راه هو اللي بنا البلاد، وانت غير كتسوّن عليها بالهدرة.”
