أعلن مصطفى بايتاس، الناطق الرسمي باسم الحكومة، أن كلفة تنزيل مقتضيات الحوار الاجتماعي الأخير غادي توصل لـ 49 مليار درهم. رقم ضخم، زوين فالعنوان، ولكن شكون غادي يدقق فالهوامش؟
الحكومة كتقول أنها رفعات الأجور ديال أكثر من مليون و127 ألف موظف، وزادت 1000 درهم صافية على دفعتين: وحدة فـ2024 والثانية نهاية يوليوز 2025. زين، ولكن واش هاد الزيادة كافية قدّام لهيب الأسعار والتضخم وغلاء المعيشة؟
الأجور غادي تطلع، حسب بايتاس، من 8237 درهم إلى 10.600 درهم شهرياً فالمتوسط، والحد الأدنى فـالوظيفة العمومية طفرناه من 3000 درهم لـ4500 درهم. ولكن من غير الأوراق والأرقام، شكون حاس بالتحسن؟
فبلوكاج صغير: الحكومة كانت علنات قبل هاد الشي أنها خصصات 45.7 مليار درهم فقط لهذ الإصلاحات فـأفق 2026… واليوم ولاّت الكلفة 49 مليار، يعني زادو أكثر من 3 مليار بلا ما شي حد يفهم واش تزادو مستفيدين ولا تكرفصات الميزانية؟
قطاع التعليم شد 17 مليار، التعليم العالي 2 مليار، الصحة 3.5 مليار… أرقام كبيرة، ولكن المغاربة ما زالين كيسولو: فين الطبيب؟ فين المعلم؟ فين الأسرة؟
أما فالقطاع الخاص، فـ”الزيادة” تبارك الله:
SMIG طلع بـ15%، وصل لـ3046 درهم
SMAG زادو فيه 20%، دابا 2255 درهم
ولكن لا تسولو على الكراء، المعيشة، الطوبيس، ولا الكَازوال… راه هادو ما كايدخلوش فالحوار.
الحكومة كذلك فرحات المغاربة بتخفيض شرط الاستفادة من معاش الشيخوخة لـ1320 يوم تأمين، ورجعت الفلوس للّي ما كمّلوش. زوين، ولكن فين اللي ما عمرهم خداو حتى ورقة من CNSS؟
ومن يناير 2025، ولات الضريبة على الدخل مخففة، والجيوب كيزيدو فيها 400 درهم تقريباً شهرياً. كلفة هاد الإجراء؟ 6 مليار درهم.
السؤال الشعبي البسيط هو:
هل 49 مليار درهم حقيقية ولا ورقية؟
وشكون غادي يراقب التنفيذ؟
وشكون غادي يراقب “المستفيدين”؟
وشحال من مواطن خارج هاد “الحوار”؟
