وزارة الشباب والثقافة والتواصل علنات على صفقة جديدة فالعاصمة الرباط، والثمن؟ أزيد من مليار سنتيم، غير باش يتصاوبو منصة موسيقية مجهزة لرابافريكا، اللي مبرمج ما بين 8 و17 غشت 2025.
الرقم الرسمي كيتكلم على 13 مليون درهم، والضمان المؤقت محدد فـ 200 ألف درهم. يعني غير باش توقف المنصة وتدوز الأيام ديال النشاط، خاص طابور ديال الدراهم كايتزغرت فالحساب.
الصفقة رقم 16/م.ش.ا.م/ص.و.ع.ث/2025، وغادي تفتح الأظرفة ديالها الخميس 31 يوليوز مع العشرة صباحاً فمديرية الشؤون الإدارية والمالية بشارع غاندي فالرباط، والوزارة كتقول راه كلشي كيدوز باحترام مرسوم الصفقات العمومية الصادر فـ 8 مارس 2023.
ولكن السؤال اللي كيتطرح: واش فعلاً الرباط خاصها منصة موسيقية جديدة، وهي أصلاً مازال كاتعيش على إيقاع موازين؟ ولا كاين شي سباق خفي على من يركب منصة أكبر فمدة أقصر؟
الوزير المهدي بنسعيد باين ماشي ناوي يحيد رجليه من فوق المسرح، وراهن على تنظيم تظاهرات فنية بحال هادي، باش يعيد المغرب للخريطة الثقافية الإفريقية والدولية.
لكن، فالمقابل، كاين اللي كيشوف أن هاد الرهان فيه ترف كبير فوسط أولويات ثقافية مازال كتسنى غير صباغة دار الشباب ولا إصلاح قاعة عرض فشي قرية.
