فـ حكومة الكفاءات اللي وْعْدات بالإصلاح والتغيير،الحرفي كايْكْرِي لَكَيوسْكْ بثمن المحل،والزربية كاتدوز من يد صانع كيمشي يصلي بالزهر،جاو المسؤولين في القطاع وقالو لينا:”خاصنا نمشيو نعرضو الصناعة التقليدية فالسعودية!”
ولكن راه ماشي بـ جُهد الحرفي،ولا بدموع الحرفية فـ الفيسبوك كتشكي من ضعف البيع…
هاد المشاركة غادي تكلّفنا 4.554.432 درهم،أي ما يقارب نصف مليار سنتيم من المال العام،حسب وثيقة رسمية من مؤسسة “دار الصانع”،ووفقًا لما كشفه موقع نيشان.
فين؟ فـ معرض اسمو INDEX Saudi Arabia،ومتى؟ ما بين 9 و11 شتنبر 2025. وشكون مشرف؟
لحسن السعدي، وزير الصناعة التقليدية والاقتصاد الاجتماعي والتضامني،واحد من خيرة شباب حزب التجمع الوطني للأحرار.
الفلوس غاديا…
والمعروض كاين…
ولكن السّؤال البسيط:
فين هو المردود؟
الحرفي مازال كيتسنى دعم باش يشري آلة خياطة، ولا طاولة نقش،ولا حتى باش يخلص واجب كراء ورشة صغيرة.
والمشكلة ماشي غير فـ الفلوس، المشكلة فـ العقلية: نمشيو نعرضو “المنتوج المغربي” بلا ما نصلحو المشاكل اللي كَتْخَنّقو من الداخل.
نمشيو نتصورو فـ جناح مغربي مزيّن، وحرفي فـ تمارة ما لقا باش يطبع كاتالوغ يورّيه للزبناء!
مصادر مهنية من الداخل وصفات هاد الصفقة بـ”المبالغ فيها”،وقالت أن الأولوية خصها تكون:
- تحديث وسائل الإنتاج
- تكوين الحرفيين
- فتح أسواق رقمية حقيقية -وتفعيل “رؤية 2030” اللي كترجعو ليها فكل ندوة، ولكن بلا تطبيق، بقات حبر فالكلام.
وهاد الشي كلو كيتزامن مع انتقادات كتطال الوزير السعدي، اللي حسب بزاف من المتتبعين،باقي كيشطح فـ الساحة الحزبية، أكثر من ما خدام فـ الميدان الحكومي.
نصف مليار سنتيم، راه ماشي لعب… وكان ممكن يفتح بيه 200 ورشة صغيرة ولا يمول مشروع حياة لعدد من التعاونيات النسائية فـ البوادي.
ولكن للأسف…الزواق الخارجي دايمًا أسهل من الإصلاح الداخلي.
وبقات الصناعة التقليدية كتسنى:
– لا دعم
– لا تسويق
– لا منصات رقمية
أما المعارض، فـ كاتجي وتدوز… والأزمة كاتبقى،والحرفي ما زال كينفخ على الفاخر باش يعيش…
–
