وسط جو مشحون فجلسة البرلمان أمس الاثنين، خرج فريق التقدم والاشتراكية مدوّي، كيرمي الحكومة بتهمة خطيرة: باغيين يدفنو حرية الصحافة ويبيعوها فمزاد المال!
النائبة نادية تهامي حطات النقط على الحروف، وقالت بكل صراحة: «الحكومة كتلعب بالنار، باغية تدير الصحافة بحال السياسة والانتخابات، تتحكم فيها الفلوس وتخرس فيها الأصوات الحرة».
تهامي دقات ناقوس الخطر، وقالت إن الوضعية ديال الصحفيين ولات كارثية: الفلوس قليلة، المخاطر كثيرة، وحتى المعلومة ولات ممنوعة بحال شي مخدرات.
الفريق زاد هاجم الحكومة على الدعم اللي كيوزعوه بطريقة مشبوهة، والإشهار العمومي اللي كيضرب فالنزاهة وكيخلي الجرائد اللي كتهضر بصوت الشعب كتموت واقفة.
«شحال عندك د الفلوس، شحال تسوا»… هادي هي المعادلة اللي بغات الحكومة تفرضها على الصحافة، حسب التقدم والاشتراكية. واللي ما عندوش؟ الله يعاونو!
تهامي ختمات كلمتها بحسرة: «الصحافة الحرة كتبرد قدام عيوننا، والحكومة فرحانة كتصفق».
فين غاديين بهاذ البلاد؟ الصحافة خصها تكون صوت الناس، ماشي سلعة كيتباع ويتشرا فيها.
