صادق مجلس النواب، لبارح الثلاثاء، بالأغلبية الساحقة، على مشروع قانون خلق “مؤسسة المغرب 2030”، اللي جا باش يحضّر البلاد لتنظيم كأس إفريقيا وكأس العالم 2030.
هاد المشروع صوتو عليه 112 نائب، عارضو غير نائب واحد، ما كاين لا ممتنع لا والو… كولشي دايرين يد في يد فهاد الحلم الكبير!
فوزي لقجع، الوزير المنتدب المكلف بالميزانية، خرج بتصريحات حماسية، وقال باللي تنظيم المونديال ماشي غير كورة وكول، ولكن فرصة باش المغرب يزدهر اقتصادياً، يخلق فرص شغل، ويزيد يقوي السياحة، ويرفع الراية المغربية في السماء.
لقجع شدد باللي هاد المؤسسة غادي تلمّ شمل الجميع: الحكومة، الجماعات، الشركات، المجتمع المدني، وحتى مغاربة الخارج… كولشي غادي يشارك فهاد الملحمة.
هاد المؤسسة غادي تكون عندها رئيس (هو نفسو رئيس لجنة كأس العالم 2030)، مجلس تنفيذي، مجلس استشاري، ولجنة ترابية يرأسها وزير الداخلية. يعني تنظيم محكم، حتى ما يبقى حد يقول “فين مشات الفلوس” أو “شكون مسؤول”!
وبين سطور الكلام، كيبان أن الكرة غادي تولي جسر التنمية، ولكن المغاربة كيسولو: “واش غادي تكون غير الكورة؟ واش غادي تمشي لينا المدارس والطرق والمستشفيات وسط الزواق والاحتفالات؟”
اليقين أن الحلم كبير، ولكن خاصو يكون فيه توازن، حيت الكرة زوينة، ولكن الخبز والتعليم والصحة حتى هما زوينين…
المهم، لقجع عطانا وعد بأن “المغرب 2030” ماشي غادي يفرحنا فالتيران فقط، ولكن حتى فالحياة اليومية… واش ننتيقوه؟ الأيام غادي تبين!
