الباز عبدالإله
وسط حضور جماهيري كبير فاق 5000 تجمعي، خرج عزيز أخنوش، رئيس الحكومة والأحرار، بكلمة كلها رسائل مشفّرة، موجهة للداخل والخارج، وقالها بصراحة: “ما تقلقوش… المغاربة عارفين شكون اللي خدام وشكون اللي غير كيزايد!”
أخنوش، اللي كان كيهضر فـ اللقاء الرابع من جولة “مسار الإنجازات”، اللي تنظم فـ أكادير، ما تفلاتش الفرصة باش يعطي التعليمات للمسؤولين ديال حزبه، من وزراء ومنتخبين، وقال ليهم: “تحلّو بالصبر، وماتخليوش التشويش يأثر عليكم!”
رئيس الحكومة شدد أن الاستقرار اللي كيعيشو المغرب وسط عالم مضطرب ماشي صدفة، وإنما بفضل الرؤية المتبصّرة لجلالة الملك محمد السادس نصره الله، وأكد أن هاد الثوابت خطوط حمراء عند الأحرار، واللي حاول يقرب ليها “غادي يسمع الجواب المناسب”.
لكن فوسط هاد التصفيقات والخطب المطمئنة، المغاربة اللي فالسبيطارات، وفالصفوف، وفالكريديات، مازال ما شافوش شكون اللي خدام بصح، ولا باقي كيبحثو فـ “مسار الإنجازات” على إنجاز يمسّ حياتهم اليومية.
أخنوش قال “ما تقلقوش”، لكن القلق واقع معاش، ماشي مجرد شعور. المعقول خاصو يبان فالسوق، فالفاتورة، فالثمن ديال الطماطم، ماشي غير فالمنصات والمهرجانات.
فـ الوقت اللي الحكومة كتطلب الصبر… الشعب بغا يشوف الثمر!
