شوفو معايا : الشركة المغربية للهندسة السياحية تطلق صفقة ضخمة قيمتها 147 مليون درهم (14.7 مليار سنتيم!) باش تشوف واش المغاربة كينعسو مزيان فالفنادق، واش السرير مريح، واش العصير فالفطور بارد، ولا الخبز محروق!
قالو ليك “الزبون السري” غادي يدور على الفنادق، يجي بحال ضيف، يطلب عصير، يطلب بيتزا، ينعس، يخرج، ومن بعد يقول شنو شاف.
وحسب مصادر إعلامية هاد الصفقة تقسمات بحال طبق الكسكس ديال الجمعة:
خمس نجوم والفنادق الفاخرة: 48,4 مليون درهم
أربع نجوم فمراكش آسفي: 50,3 مليون درهم
أربع نجوم فباقي الجهات: 28,8 مليون درهم
ثلاث نجوم: 20,3 مليون درهم
ما نساوش حتى الرياضات، القصبات، ودور الضيافة… يعني حتى لي عندو رياض صغير خاصو يضرب حساب!
الهدف؟ قالو باش نواكبو التصنيف الجديد، ونرفعو من الجودة، ونديرو المنافسة، ونسهلو على السائح يتهنا وينعس مرتاح.
ولكن المواطن كيسوّل: “فين غاديين بهاد الملايير؟ واش مابقاتش قطاعات أخرى محتاجة الفلوس؟ المستشفيات، المدارس، الطرقان؟”
حنا مع الجودة، ومع السياحة، ولكن لاش هاد التبذير؟ واش خاصنا نراقبو النعاس بملايير دالفلوس؟
واش غادي يجي النهار اللي نلقاو فيه حتى “زبون سري” كيمشي يراقب المستشفيات والمدارس؟ ولا داكشي ما داخلش فالمخطط ديال “النعاس الفاخر”؟
