مرة أخرى، خرجات نعيمة الفتحاوي، البرلمانية عن حزب العدالة والتنمية، لتجلد الحكومة قدام البرلمان، وتفضح الواقع الصحي والاجتماعي اللي مبقاش كيتخبى حتى على العميان.
الفتحاوي بدات مداخلتها بطريقة ساخرة مرّة وحزينة مرّة أخرى، وقالت:
“السيد رئيس الحكومة، كنرحبوا بك، بعدا غبتي علينا بزاف! يلا جيتينا 18 مرّة من أصل 32 مرّة اللي خصك تجي، هذا راه خرق صارخ للدستور ولقرار المحكمة الدستورية. هذا السؤال ديالي جبتو للمرة السابعة، ولكن للأسف نفس الهضرة، نفس الجواب… كل متنس والوا، حبيبي!”
ومن بعد، دخلات مباشرة فالموضوع اللي كيهم كل مغربي كيشوف والديه ولا ولادو كيتعذبوا قدام باب السبيطار:
“كتقولو تدعيم ركائز الدولة الاجتماعية، ولكن فاش؟ شعار زوين فالمؤتمرات، ولكن فالأرض الواقع؟ اختلالات كبيرة في التفعيل والتنزيل ديال الورش الملكي، اللي كلنا بغيناه ينجح، ولكن خاص الحكومة تكون عندها الجرأة باش تدير التنفيذ والإجراءات الحقيقية.”
وزادت كتقرا التقارير الرسمية قدامهم:
“بنك المغرب، المجلس الأعلى للحسابات، المجلس الاقتصادي والاجتماعي… كلهم دقّو ناقوس الخطر، قالو كاين مشاكل فالحكامة والاستدامة. واش عارفين سيد الرئيس؟ كاين 8.5 مليون مغربي مقصيين من هاد الاستفادة!”
وما وقفاتش هنا، سالات كتشعل الميكروفون:
“فين الأجندة المحددة للتنزيل؟ فين الحصيلة ديال أربع سنين؟ ورّونا، ولا كلشي غادي يذوب قبل ما تذوبو انتو؟ فين تسريع تعميم التغطية؟ فين تأمين المخزون الاستراتيجي ديال الدواء؟ كاين أمراض مستعصية ما عندهاش حتى دواء… فين السلة ديال العلاجات اللي تزادت فيها بزاف، ولكن المستشفيات كتبقى عاجزة، المواطن حاس راسو ضحية وسط مسرحية الشعارات!”
وختمات الرسالة ديالها بواحد “الصفعة”:
“كنتمناو تاخذوا الرسالة بجدية… والسلام.”
