قالت وزيرة الاقتصاد والمالية، نادية فتاح اليوم الجمعة بالرباط ، إن تنظيم المغرب لكأس العالم 2030 غادي يخلق أزيد من 100 ألف فرصة شغل سنوياً.
كلام زوين، ومفرح، ولكن كيخلّي الناس يسولو: واش بصّح ولا غير الهضرة؟
الوزيرة شدّات الميكرو قدّام الحاضرين وقالت إن هاد الأرقام مبنية على “نمذجة دقيقة”.
والمغاربة كيعرفو، مني كيسمعو كلمة “نمذجة”… راه كيعني أن شي ناس دارو دراسة على الورق، فيها بزاف ديال “ربما”، و”قد يكون”، ولكن فالميدان، كيكون بزاف ديال “ما كاين والو”.
واش عارفين شنو كيعني 100 ألف منصب كل عام؟
يعني تقريبا مليون مغربي يخدمو فـ10 سنين.
فين؟ فالبناء؟ فالنقل؟ فالسياحة؟ ولا فشي بلايص ما غاديش يشوفوها ولاد الشعب أصلاً؟
فـ2025، مازال ناس في الجبال كيقلب على شهادة السكنى، وما كاين لا طوبيس، لا ماء، لا مستوصف،
لا ريزوا والخدمة كتجي غير بالمعارف ولا بالمحسوبية…
وتجي الحكومة وتقول لينا “غادي نخدمو الناس بالمونديال”؟
آه، بغينا نخدمو، والمغاربة كيستاهلو، ولكن:
فين هو المشروع؟ فين هي الخطة؟ فين المعايير؟
الوزيرة الأخرى، أمل السغروشني، قالت: “غادي نعتمدو على الذكاء الاصطناعي باش ندخلو الناس للخدمات الرقمية”.
مزيان، ولكن راه بزاف ديال الناس مازالين ما عارفينش كيفاش يحجزو موعد فالمقاطعة… ومزال كيطلب ليك شهادة الحياة وأنت واقف قداموا، واش غد
ندوزو مباشرة للذكاء الاصطناعي وحنا مازال ما ساليناش مع الذكاء الطبيعي؟
الشعب ما كيبغيش يتبكّى، كيبغي يسمع ويشوف.
وعلاش لا؟ يعطيونا النمذجة، يحطوها للناس، يفهموهم فين كاين الشغل، شحال غادي يكلّف، وشكون غادي يربح.
ماشي كلشي خاصو يمشي للحلم…
بزاف ديال الناس خاصهم يمشيو يخدمو اليوم، ماشي حتى لـ2030.
