وسط صدمة كبيرة وفايسبوك شاعل، خرج عبد الإله بنكيران، الأمين العام لحزب العدالة والتنمية، ووجّه مدفعيتو الثقيلة مباشرة نحو وزير العدل عبد اللطيف وهبي، بسبب تسريبات خطيرة منسوبة ليه، كتقول أنه صّرّح بثمن خيالي ومنخفض بزاف فملف عقاري باش يهرب من الضرائب.
بنكيران فخرجة نارية كتب فالفيسبوك:
“تصريح وزير كيغش فوثيقة رسمية وكيقدمها للضرائب، وكيصرّح بأقل من عشر الثمن الحقيقي للعقار؟ راه هادشي ماشي غير مخالفة… هادشي نصب واحتيال على القانون والدستور!”
وأضاف:
“الاستقالة ديال هاد الوزير ماشي اختيار… راه واجب، فدولة القانون، خاص المسؤول يربط المسؤولية بالمحاسبة… وانتهى الكلام!”
وهبي، اللي كيحمل حقيبة العدل، لقا راسو اليوم وسط عاصفة ديال أسئلة محرجة:
علاش ما صرّحش بالثمن الحقيقي؟
واش هادي مجرد صدفة؟
ولا كاين شي ممنهج؟
الهاكرز اللي سربو الوثائق (جبروت)، ماشي أول مرة يضربو وزراء فالحكومة. هاد المرة ضربو جوج ديال الوجوه البارزة: وهبي والمنصوري، وزيرة التعمير. التسريبات بينات وثائق مالية وعقارية، وخلات الرأي العام يقول: “شنو باقي مخبي؟”
ولكن… كاين اللي كيسوّل: علاش دابا؟
شنو الهدف من هاد التسريبات؟
واش فعلا جاية من منطلق محاربة الفساد؟
ولا كاين شي سيناريو سياسي خفي.
الشارع المغربي اليوم ماشي ساكت:
“وزير العدل خاص يكون قدوة، ماشي نموذج للغش والتهرب!”
“إذا ثبتت الوثائق، خاص يخرج من الباب الكبير… وبلا بروتوكولات!”
واش وهبي غادي يخرج يشرح؟
ولا غادي يسلكها بالصمت؟
ولا كاين شي “عفو ضريبي” كيتسارى؟
