الباز عبدالإله
يا سلام!
المندوبية السامية للتخطيط خرجات بتقرير جديد وقالت لينا بصدر رحب: ثقة الأسر تحسّنت!
وصلات لـ 54,6 نقطة فالفصل الثاني ديال 2025، بعدما كانت 46,6 فالفصل اللّي فات.
آش كيوقع هنا؟
بلا ما نكذبو على راسنا، راه الناس ما بقاتش كتشري، ما بقاتش كتوفّر، وما بقاتش كتحلم أصلاً!
كيفاش عرفنا؟
76% من الأسر قالت المعيشة تدهورات فـ12 شهر الأخيرة
44,9% كيتوقعو تدهورها أكثر فالمستقبل
72,7% كيقولك: ما كاين لا ظرف لا والو باش نشري شي حاجة كبيرة
والمصيبة الكبرى؟
غير 1,8% من العائلات قدّرو يدّخرو شي حاجة…
بمعنى: كلشي عايش يا إما بـالكريدي يا إما كيستنزف الباقي ديال مدخراتو!
المؤشرات كلها كتبكي:
الوضع المالي: ناقص 38,8 نقطة
التصوّر للمستقبل: ناقص 8,5 نقطة
رأي الأسر فالوضع العام: الله يجيب الصبر!
والمندوبية كتقولك: “الثقة طالعــة”
إييه واخا… طالعـة فين؟ فـاللا شعور الجماعي؟
الخلاصة:
بغاو يقنعونا أننا متفائلين وسط بلاد فيها:
بطالة طالعـة
مصاريف خانقة
القدرة الشرائية طايحة
والأمل كيدوز من فوق راسك بلا ما يحيّيك!
الحاصول، إذا كانت هادي هي الثقة… الله يعطينا غير شوية شك!
