كشفت مصادر إعلامية أن جهة الرباط – سلا – القنيطرة، عاشت بين سنتي 2022 و2023 واحد من أكبر عروض “اللا محاسبة” فالمغرب، بعدما تم تفويت مشاريع بقرابة 375 مليون درهم لثلاث شركات، بلا طلبات عروض، بلا منافسة، بلا حتى داك التمثيل ديال الشفافية!
المشاريع كانت كتشمل:
إعادة استعمال “المياه العادمة” فالسقي (215 مليون درهم، الجهة ساهمات بـ40 مليون)
تهيئة طرق فلاحية (160 مليون درهم، الجهة دفعات منهم 50 مليون)
والمستفيدين؟
ريضال، الرباط الجهة للتهيئة، الصخيرات تمارة للتهيئة والتنمية
يعني ثلاث شركات “محضوضة”، خذات كلشي بلا صداع!
والأخطر:
صفقات كتمشي بلا مهندسين
التأمين ما كيغطيش فترات الأشغال
تقارير “الشتا” كاتبرر التوقيف… فسنوات الجفاف!
أظرفة بدون أثمان، عروض ما كتسجّلش، والشفافية ضاربة الطم
فين؟ فـ عاصمة الدولة، فسنوات حديثة (2022 و2023)
الرباط سلا القنيطرة، اللي خاصها تكون مرجع فالحكامة، ولات حقل تجارب ديال “كيف تصرف المال العام بلا محاسبة”
أشنو غادي نقولو على الجهات الأخرى؟!
إيلا فالرباط كاينة هاد السيبة، فمراكش، كازا، وجدة… آش طاري؟
الخلاصة:
2022 و2023 دازو، واللي داز معاهم هو 375 مليون درهم…
مشاريع تمرّ بلا مناقصة
خروقات موثقة
والحكامة؟ كتنشف فالشمس!
أشنو خاصنا؟ زلزال سياسي؟
ولا غادي نقولو: راه هاد الشي غير “سوء تدبير” كيتعاود كل عام؟
