في مشهد ماشي معتاد داخل قبة البرلمان، خرج البرلماني المثير للجدل هشام المهاجري بتصريحات نارية فـ وجه وزير الصحة أمين التهراوي، متهماً إياه بالتفرغ للصفقات وتجاهل صحة المغاربة، بل وصل به الأمر يقارن أداء الوزير بـ”تشات جي بي تي”، وقالها بصراحة:
“حتى الذكاء الاصطناعي عطاني معطيات أحسن من اللي جبت لينا!”
المهاجري ما خلاش في قلبو وتابع الهجوم ديالو على الوزير قائلاً:
“من نهار جيتي وانت كتهضر غير على الصفقات.. طلع هادي نزل هادي، ولكن راك وزير الصحة ماشي وزير المالية!”
وفـ خطاب شعبي قاصح، تساءل المهاجري قدام باقي النواب:
“آشنو غادي نقول لناس 18 جماعة قروية كيتسناو مستشفى تقرب ليهم العلاج، ومشروعو بدا قبل 7 سنين؟ واش نقول ليهم الوزير قال لينا نصبروا حتى لـ2030؟”
ولـ يكملها بقصف مباشر، قال:
“جيتينا بورقة كتقرا منها أرقام سبق سمعناهم، حتى رئيس الحكومة قراهم قبل منك… وأقسم بالله، لو سألت شي مواطن فـ الزنقة، يعطيني أرقام أكثر واقعية!”
خلاصة:
هادشي ماشي غير تعقيب برلماني، هادي صفعة سياسية من داخل الأغلبية نفسها. وزير الصحة غارق فـ لغة العروض والباوربوينت، والمواطنين غارقين فـ الانتظار والمرض.
وإذا ولات ChatGPT كتعطي معطيات أوضح من وزير فـ حكومة الكفاءات… راه خاصنا نراجعو شكون يستاهل فعلاً يتخلص على خدمة الصحة: الوزير ولا ChatGPT؟
